તૂટ્યા પછી સાંધ્યું નથી…!

હકથી વધારે કઈં જ મેં માગ્યું નથી
મારા પછી, બીજું કશું તાગ્યું નથી

હા, એક-બે અપવાદ છે પણ એ પછી
કઈં જિંદગીના પોત પર ટાંક્યું નથી

શું થાત જો રહી જાત સઘળું યાદ તો ?
સારૂં થયું કે યાદ કઈં રાખ્યું નથી

સપનાં ય જોયાં છે, ગજું જોયા પછી
ફળ એટલે અતિરેકનું ચાખ્યું નથી

સહુની સમસ્યા આમ તો સરખી જ છે
ટાળી શકે, એ કોઈએ ટાળ્યું નથી !

પીવી પડે છે છાશ પણ ફૂંક્યા પછી
છે કોણ એ, જે દુધથી દાઝ્યું નથી ?

સંધાય તો પણ તડ નિશાની છોડશે
તેથી, કશું તૂટ્યા પછી સાંધ્યું નથી !

ડો.મહેશ રાવલ